Qeveria vendos rimbursimin e TVSH-së brenda një muaji. Kryeministri Berisha, duke prezantuar projektin e ri mbledhjen e Këshillit të Ministrave, u shpreh se parimi “heshtja, është pranim” do të jetë i vlefshëm edhe në këtë rast.

“Vendosim që TVSH-ja të rimbursohet brenda një muaji. Parimi “silence is consent” që në këtë rast ka këtë kuptim: në rast se brenda një muaji autoriteti tatimor nuk ka rimbursuar TVSH-në, sipërmarrësit i lind automatikisht e drejta për të mos derdhur taksat e tjera. Ai do të mbushë formularin, do ta nisë, por nuk do të derdhë gjë gjer në shumën e TVSH-së. Pra, nis përfitimi i saj,” u shpreh Kryeministri.

Kryeministri Berisha u shpreh se ky vendim shndërron në ligj një nga premtimet elektorale, në traditën më të mirë të mbajtjes së premtimeve dhe që i jep fund arbitraritetit të shtetit.

“Ky ka qenë një premtim shumë i goditur dhe kjo i jep fund një herë e mirë arbitraritetit të shtetit, i cili, duhet të jemi realistë nuk ka qenë i ekzagjeruar, por nuk duhet të ekzistojë dhe nuk mund të themi se nuk ka ekzistuar."

Kryeministri tha se me këtë standard të ri, Shqipëria vendos një parim të ndershëm dhe lehtësues për biznesin.