Kryeministri Berisha vizitoi sot në mesditë ambasadën e Mbretërisë së Arabisë Saudite, në Tiranë ku shprehu ngushëllimet për ndarjen nga jeta të Princit të Kurorës, Zëvendëskryeministrit dhe ministrit të Brendshëm të Mbretërisë së Arabisë Saudite, Nayef bin Abdulaziz Al Saud.

Kryeministri shprehu hidhërimin e thellë për humbjen e një figure të shquar për kombin dhe Mbretërinë e Arabisë Saudite, por njëkohësisht edhe të një miku të çmuar për Shqipërinë dhe shqiptarët. Kryeministri tha se Princi i Kurores Nayef bin Abdulaziz Al Saud, do të kujtohet gjithnjë me nderim e respekt për kontributin e tij në drejtim të paqes e begatisë së vendit të tij.

I shoqëruar nga ambasadori i Arabisë saudite në vendin tonë, zoti Abdullah Abdulaziz Al-Abdulkarim, si dhe përfaqësues të tjerë të trupit diplomatik, Kryeministri Berisha la një shënim në Librin e ngushëllimeve të hapur me këtë rast nga Ambasada e Mbretërisë së Arabisë Saudite.