Kryeministri Berisha priti sot, në një takim të përzemërt, Kryetarin e Bashkimit Demokratik për Integrim të Maqedonisë, zotin Ali Ahmeti.

Në takim u diskutua gjerësisht për bashkëpunimin e gjithanshëm midis dy vendeve tona, në fushën ekonomike, arsim, kulturë, shkencë dhe në të gjitha fushat me interes të përbashkët.

Zoti Ali Ahmeti e njohu Kryeministrin me zhvillimet e fundit në Maqedoni, me progresin e bërë në drejtim të zbatimit të marrëveshjes së Ohrit, me kontributin e BDI-së në qeverisjen e vendit, rritjen e ndjeshme të pjesëmarrjes së shqiptarëve në këtë qeverisje, amnistinë për luftëtarët e lirisë, e të tjera çështje.

Kryeministri Berisha i vlerësoi të gjitha këto këto arritje si shumë të rëndësishme. Gjithashtu, Kryeministri shprehu gatishmërinë e qeverisë shqiptare për të punuar intensivisht në konsolidimin dhe thellimin e mëtejshëm të bashkëpunimit miqësor midis dy vendeve.

Kryetari i Bashkimit Demokratik për Integrim, Ali Ahmeti, shprehu vlerësimet për zhvillimet në Shqipëri dhe vendosmërinë e BDI-së dhe qeverisë maqedonase për një zhvillim të mëtejshëm të këtij bashkëpunimi reciprok.