Kryeministri Berisha priti sot, në takim, ambasadorin e Belgjikës, zotin March Michielsen, me rastin e përfundimit të detyrës në Shqipëri.

Pasi i uroi përzemërsisht mirëseardhjen, Kryeministri Berisha e falenderoi ambasadorin Michielsen për bashkëpunimin dhe kontributin që ai ka dhënë gjatë kësaj periudhe, në afrimin e mëtejshëm të dy vendeve dhe kombeve, në konsolidimin e marrëdhënieve shumë të mira e miqësore dhe në bashkëpunimin e  gjithanshëm e të suksesshëm midis dy vendeve e qeverive.

“Ju largoheni si një mik i madh i Shqipërisë dhe shqiptarëve, por jeni përherë i mirëpritur si vizitor, turist apo investitor, në vendin tonë,” - tha Kryeministri.  

Ambasadori Michielsen e falenderoi Kryeministrin për pritjen e ngrohtë e miqësore dhe për bashkëpunimin shumë të mirë që ai ka pasur gjatë kësaj periudhe me qeverinë shqiptare. Ambasadori Michielsen vlerësoi  transformimin e jashtëzakonshëm që ai ka parë gjatë kësaj periudhë, në të gjitha fushat, në Shqipëri. Në veçanti, zoti Michielsen vlerësoi zhvillimin ekonomik, liberalizimin e vizave për qytetarët shqiptarë, si një arritje historike e realizuar në vitin 2010 dhe arritjet e rëndësishme në projektin madhor kombëtar për integrimin europian.

Në takimin u vlerësua në veçanti vizita e Kryeministrit belg Leterme dhe e Princeshës Mathilde, si ngjarje shumë të rëndësishme që kanë ofruar një kontribut të padiskutueshëm në konsolidimin e marrëdhënieve miqësore midis dy vendeve, por edhe në nxitjen e investitorëve belgë për të ardhur në Shqipëri. Një sërë kompanish belge janë ndërkohë prezent në fusha të ndryshme në Shqipëri, si ato të tregtimit të produkteve të konsumit të gjerë, sektorin farmaceutik, komunikacionit etj.. Ndërsa sektorë si ai i energjetikës, sektori minerar, trajtimi i mbetjeve etj. vlerësohen si sektorë potencialë të zgjerimit të bashkëpunimit në të ardhmen.

Kryeministri Berisha e njohu gjithashtu, ambasadorin Michielsen, me punën intensive që po bëhet për përmbushjen e 12 rekomandimeve të Komisionit Europian, si dhe në shumë fusha të tjera.

Ambasadori belg vlerësoi shumë të rëndësishëm lajmin për përmbylljen e reformës elektorale, me konsensus të plotë, si dhe i shprehu Kryeministrit vlerësimin për progresin për 12 prioritetet, duke i rikonfirmuar mbështetjen e plotë të Belgjikës për anëtarësimin e Shqipërisë në Bashkimin Europian.

Pas takimit, Kryeministri Berisha shtroi një drekë për nder të ambasadorit Michielsen.